Demo2 first Demo5 second Demo5 secondDemo2 thirdDemo2 thirdDemo2 fourthDemo2 secondDemo2 secondDemo2 secondDemo2 second

News

Au die Saison simer es neus Team gsi. Coacht gworde simer vom Wöufu ond au gelgetlich vo de Jenny ond d Sabrina ond sogar d Debby. Da mir uf verschedeni Arte vo verschedeni Coaches coachet worde sind, isch es mängisch verwirrend gsi, aber schlussendlich hemer vel vo ihne chöne mitnäh.
I d Saison simer mit nem top spel geg de BTV Aarau gstartet. Mir hend zwar 3:0 verlore, doch mir hend alles gäh ond die Sätz sind nor sehr knapp a de BTV gange. Wenn me bedenkt, dass die Spelerinne mehr als mir trainieret, hemer eus super gschlage. Mir chönet uf es Spel mit guete Abnahme, guet gstellti Blocks ond härte Agriff zrügluege.
Leider isch es ned immer möglich gsi die glich Energie, wie vo dem erste Match, au i andere Spel ufrecht zerhalte. Mir hend eus oft sehr stark vom Gegner la beiflusse la. Sind sie schlechter als mir gsi, hemer eus schnell uf ihres Niveau abegla ond teilwis sehr knapp gwonne. Sind sie besser als mir gsi, simer oftmals ines Loch keit. Nichtsdestotrotz hemer eus generell guet gschlage ond i de meiste Mätch alles gäh. De kampfgeist isch teils so wit gange, dass Alina, wo eigentlich zum Ushälfe cho isch, zum de Ball go rette öber es Bänkli gsprunge isch ond sich debi en ehrevolli Verletzig zuzoge het. (es gaht ihre weder guet) Onglöcklicherwis isch es ned glunge, aber die Tat blibt i eusne Herze.
Es anderes Spel geg Zelgli, wo die Saison öberraschenderwis recht guet onterwägs gsi isch, verzeichnet au en dramatische Rettigsversuech, de dasmol sogar glunge isch. De Ball goht nachem härte Agriff euser Paseusin Olivia be de erst berüehrig us de Hand ich bechom ne irgendwie ufe, während ich ohni Knieschoner öber de Bode gleite ond be de 3. Ballberüerig isch es Dorkas gsi, die de Ball öberebrocht het, ond die eint vo Zelgli so öberraschend troffe het, dass sie grad de Ball la kheie het. Vilicht chas me grad ned ganz so nachvollziehe, wel die meiste wo höt awesend sind ned debi gsi sind, aber die Stimmig isch denn plötzlich zu wild gsi ond de Coach vo Zelgli het müesse es Time Out näh. Zu eusem Nachteil isch sin Plan ufgange. Mir hend 3:1 verlore gha, aber mir hend so einiges drus chöne zieh. Ond wer am schluss vom Spel ned schnell gnueg d Flucht ergriffe het, isch vo de Debby is füddli ginkt worde, wel mir alli so langi Gsichter zoge hend. Aber jetzt rückblickend isch Niederlag ned ganz so schlimm gsi, denn euses Dame 1 het deför direkt nach eus Zelgli besiegt.
Wie me gseht isch es turbulent zuegange, mängisch zfest, mängisch zwenig. Ufjedefall hemer vel us de Spel chöne lehre. Wo eusi stärkine sind ond wo mir no zschaffe hend. Vo 10 Teams hemers uf de stabile 6. Platz gschafft.
Mir danke ganz herzlich üse zahlriche Coaches, ohni die mir das ned hebecho hättet. mir hend uf sehr vel verschedeni Arte zemmeschiss kassiert und das het eus schlussendlich stärker gmacht. Mir hend so einiges chöne lehre ond hend es sehr gschätzt, dass wenn de Wöufu ned het chöne ad Mätch cho, d Jenny, d Sabrina ond au d Debby usgholfe hend. Vel vo eus werdet nöchst Saison nüm im U23 2. Liga spele, aber mir wüsse, dass sneue Team i guete Händ si wird.

171 Views • Kategorien: Juniorinnen U23
« Ü32 Jahresbericht » Zurück zur Übersicht « U23 4. Liga Jahresbericht »
Archiv

» Veranstaltungen

Generalversammlung

» Youtube-Kanal

D1 auf der Suche nach einer Trainerin/einem Trainer - we want you!