Laudatio Rahel Frey

So, und jetzt chömemer no zo de Verabschiedig vo eusere Präsidäntin. Ich ha d’Ehr es paar Wort, also zemlich vöu, Wort zo ere und em Spezielle zo erem Oftriger-Volleyball-Läbe zsäge. Rahel Frey und me verbendet nämlech ned nome de Vorname. Bewosst öber de Wäg gloffe semmer öis 1984, de semmer nämlich zKüngoldingen zäme i Chendsgi.

De send no föif gmeinsami Primarschueljohr cho, bevor eusi Schuelische Läbe sech trennt het. Deför het öises gmeinsame Volleyball-Läbe agfange: 1991 esch es gsi, wo mer gmeinsam serschte Mou zäme em Schuelsport gsi send ond öisi erste Volley-Versüech gstartet händ. Sed denn semmer met em Volleyball verbonde met vöu gmeinsame Statione ond ou döttige, wo e anderi Hemmusrechtige gange send. Mag sii, dass i be dem, wo ni jetz so verzöue, ächli e de Johreszahle tüüsche, aber das esch egau. Met 14i semmer de em Verein biiträtte – DR Oftrige Volleyball het de dozmou no gheisse. Met öppe 16i hämmer denn s’erschte Mou döffe eneme Dame-Team spele – abgstege semmer. Denn het sechs zeigt, dass e de Rahel meh dren steckt als be mer ond mer händ serschte Mou e onterschedleche Teams gspöut: Si die 1. Liga und ich e de 3. Liga … abgstege semmer beidi. Das tönt nach emene sehr erfolglose Volleyläbe – aber zom Glöck hets no dJuniorinne gä, wo mer es paar mou haarscharf am Aargauertitel verbii gschrammt send. Ond das dRahel ned ide Aargaueruuswau gsii esch, esch de Tatsach zveranke, dass mer am Tag vom Uuswau-Training händ för de Verein müesse go Lösli verchoufe.

Dä Aargauertitu esch de gliich no cho: 1998 met em Dame 1. I dere Saison hämmer emmer wahnsennig veli männliechi Zueschauer gha … me monklet, es seg ned wäg de guete Leischtig, sondern de ultrachorze Hose gsi.

Em gliiche Johr het dRahel ou de Grondstei för eri erfolgriichi Trainerkarriere gleit – i muess äuä ned erwähne, dass mer ou de J&S-Kors zäme gmacht händ (ich säuber ha aber leider bald müesse merke, dass Trainer si gar ned mis Deng esch).

Ond em 98i esch es gis, wo mer zäme öppe de verzwiifelschti Momänt erläbt händ – nei ned wäge de schlächte Volleyball-Resultat – denn hämmer nämlech noni gwösst, dass eus e ponktloosi 1.-Liga-Saison bevor stoht. Mer send nämlech nacheme Trainingsspöu ide Halle iigsperrt gsi, natürlich ohni Natel – das esch jo schliesslech em letzschte Johrtuusig gsi! Am Aafang eschs jo no loschtig gsi, mer händ ächli Musig glosst, e de Aanahm, dass öisi Volleygspändli jo scho merke, wenn mer fähle. Aber ergendeinisch eschs de nömm so loschtig gsi. E Liechtbleck esch gsii, wo mer dosse es paar Lüt händ gseh doreloufe. Ond denn esch er cho, de Verzwiifligsmömänt: of öises Chlopfe, Wenke, Gompe, Hämmere händ öis die Passante ned öppe befreit, sondern nome eso [Scheibenwischer vor dem Gesicht] gmacht. Om Metternacht ome, send denn öisi Gspändli gliich no met em Schlössu dehär cho.

Nach de erwähnte Saison (es esch auä de letschti Absteg vo de Rahel blebe) hets denn dRahel Rechtig Weschte zoge: Si het de Verein verloh – also de Uustrett gäh – und esch zSchönewerd go Nati B spele. Ond öisi Volleywäge händ sech för es paar Johr trennt.

Wo si es paar Johr spöter zrogg cho esch, beni nämlech zZöri Onderland aktiv gsi. Denn het dRahel aber Wend öbercho, dass ich weder zrogg id Region chome go wohne und het mer – als Trainerin vom Dame 1 – aaglüte, öb ich ned weder zrogg i Verein chäm. Klar chomi, ond so rechtig wäg beni jo nie gsii, sondern emmer als Passivmetgled met em Verein verbonde blebe.

Denn esch si aso plötzlech mini Volleytrainerin gsi – komisch am Aafang, aber guet. Do enne setze jo es paar Lüt, wo si als Trainerin erläbt händ, ond ich rede auä allne usem Härze, wenn i säge, dass si

eini vo de beschte gsii esch, wo ni jeh gha ha. Ond ebe, Volley speli sed baud 30 Jahr. Ond erfolgriich esch si ou gsi: Hämmer doch onder ere zom Biispöu em 2013 sDouble ghout: Aargauer Meister und Aargauer Cupsieger. Es esch wonderbar, dass dRahel, nachdem si leider de Aktiv Volleysport a Nagu het müesse hänke, wöu de Körper nömm metgmacht het, si eri Energie andersch em Verein het lo iiflüsse.

Bekanntermasse esch si jo ou em Volleyvorstand (ond natürlich esch ou si gsi, wo mer aaglüte het, wo sie es nöis Vorstandsmitglied gsuecht händ) – ond das 11 Johr. Finanze het si gmacht, bevor mer si denn als Präsidäntin gwählt händ. Eres primäre Ziil esch secher gsi, dass si bes ade GV 2019 dorezstoh: Denn het si nämlech ändlech chönne sZähjährige Vereins-Jubiläum fiire. Dommerwiis händ eri Vereinsjohr nämlech weder be 0 aagfange, wo si zrogg cho esch. Tja, wär si nome Passivmetgled blebe, de hätti si einigi Johr früener döffe fiire.

Was zeichnet dRahel uus? Engagement: Sösch hätt sie wahrschindlech ned so vöu Ziit ide Halle, a Vorstandssitzige ond vorem Compi vorfende gsi.

Beharrlichkeit: Wie mängisch het si müesse hondert mou nochefroge, wöu mer Vorstandsgspändli wederemou eri Froge ned beantwortet händ.

Gnauigkeit: Wär mou eri Vorprotokoll förd Vorstandssitzige gseh het, de weiss, vo was ich rede.

Ned chönne chorz fasse: D’Vorprotokoll send eis. Aber eri Präsidäntinne-Johresröckbleck öppis anders: De Rekord stoht be 6 Siite. Schreftgrössi 9!! Ond wenn si mer dä ame gscheckt hätt, emmer begleitet met de Wort: «Ich ha mi probiert chorz zfasse, aber …»

Tja, ich ha mi ou wöue chorz fasse, aber … 36 Johr send e langi Ziit, i ha nämlech no lang ned aues verzöut: do gäbs no die velle gmeinsame Tenero-Ufenthäut als Teilnähmerinne – be de Rahel send denn no dötigi als Leiterin dezue cho. Oder dVolleynight, e öisere 1.-Liga-Saison wo’s zwöi Verletzti gäh het ond mer vo öisem Trainer gottsjämmerlech zämegschesse worde send, wo as am Toni sis Chaquet abegheit esch oder wie sech das afüehlt, wenn me acht Stond Zog fahrt, zom e 45 min in Chiasso zverlüüre ond ond ond.

Auso, liebi Rahel, jetz wotsch du emou es Johr kenni Uufgabe fürs Volleyball ha. Mer näme di bem Wort: 1 Johr. Das esch schnäll verbii. Ond denn chonnt sTelefon vom mer oder en Iilade zom Kafi ide Cafeteria. Öises Volleyläbe trennt sech jetz zwar, deför schaffemer am gliiche Ort.

Dorom bliibt eus jetzt nor no, der vo ganzem Härze danke für all de Iisatz und dini Energie, wo du ide Verein brocht hesch. Was chönnte mer der schänke? Aso am liebschte hättider jo de Schriiberuuswiis gschänkt. Denn man höre und staune, de hesch du tatsächlich nie gmacht. Aber das goht jo ned.

Als Gschänk wettemer der gärn dEhermetgledschaft schänke. Mer hoffe, dass das ou im Senn vom Verein esch – dänke aber scho.